एक असतं असणं
अन एक असतं वाटणं
दोहोंच्या मध्ये असतं
खूप सारं घुटमळणं
वाटण्याला नसतात सीमा
जणू इंद्राचं भव्य राज्य
असण्याला राहावं लागतं
सदैव जमिनीवर सज्ज
वाटण्याला असतात असंख्य
स्वप्नरंजित कल्पनांचे पंख
असण्याच्या कानांत निनादतात
वास्तवाचे चिरस्थित शंख
असणं आणि वाटणं
जेंव्हा होतं एक समान
संदिग्धतेला नाही उरत
कोणतंच प्रमाण
सहस्त्रांमध्ये एक असतात
असे हे दुर्मिळ क्षण
जस असणं तसच वाटणं
स्वीकारते हे चंचल मन
No comments:
Post a Comment